طريقة عمل عدس بالشعرية والتقلية فاطمة ابو حاتى

 

السلام عليكم ..

النهارده جايبالكم وصفة انما ايه حلوة اوى كلنا بنحبها فى الشتاء مغذية وبتدفى وفيه بروتين يعنى وجبه كامله ..

هقولكم على كل التفاصيل وهخليكى توب شيف ..

عدس بالشعرية والتقلية :

اول حاجه هنجيب نصف كيلو عدس اصفر وننقعهم كام ساعة علشان الناس اللى عندها القولون ..

بعدها هنجيب حله الضغط او حله عادية ونحط فيها العدس و4 طماطم وسط

وبصله وتوم وجزر مبشور وممكن نبشر كوسه مش بتبان فى الطعم وفوايدها معروفه

معلقه صلصه وتوابل وشطه وملح ومكعب مرقه دجاج او شويه شوربه ونغطى العدس اول ما يغلى نوطى النار ونسيبه يستوى لحد ما يتهرى ..

اما يستوى هنجيب الهاند بليندر ونضربه او نحطه فى الخلاط ونضربه ..

هنجيب حله ونحط معلقتين كبار سمنه بلدى ونحمر معلقتين كبار شعريه واما يتحمروا نحط العدس عليهم ونقلب وندوق نشوف الملح

فى طاسه هنجيب بصلتين مبشورين مع معلقتين سمنه ونحمرهم ونحطهم على العدس ..

او نحطهم فوق الطبق ولو عايزاه شوربة عدس خففى العدس شويه ..

والف هناا