كحك العيد الناعم اوى بطريقه فاطمه ابو حاتى





السلام عليكم ..
النهارده جايبالكم وصفه سهله وحلوة اوى هتعجبكم ..
كحك العيد :

المقادير :

 كيلو دقيق للكحك و البسكوت
٦٠٠ جرام سمنه بلدي
معلقه كبيره ممسوحه خميره
معلقه كبيره ممسوحه بيكنج بودر
٢ معلقه كبيره سمسم محمص
٢ معلقه كبيره سكر بودره
معلقه كبيره ممسوحه ريحة كحك
رشة صغيره ملح
تلت كوب لبن



الحشو :
نص كيلو ملبن
هنعجن الملبن مع معلقه صغيره سمنه و نشكله كور صغيره متساويه عشان يبقى جاهز و احنا بنشتغل علطول و ممكن نضيف معاه أي مكسرات بنحبها زي عين الجمل أو البندق .

الطريقه :
أول حاجه هنحط الخميره في كوبايه و عليها رشة سكر و معلقة ميه دافيه و نقلبها و نسيبها تخمر و تعلى .
و بعدين هنجيب بوله كبيره و نحط فيها الدقيق و عليه السمسم و السكر و ريحة الكحك و الملح و البيكنج بودر و نقلبهم كويس .
هنحط السمنه في حله على النار و نخليها تسيح و تبقى دافيه مايله للسخونه من غير ما تقدح و نطفي عليها و نروح نعمل حفره في وسط الدقيق و ننزل السمنه و نقلب بمعلقه عشان بتبقى سخنه على ايدنا ، اول ما ننزل السمنه هنحس أن العجينه سايله أو طريه زياده منقلقش هنكمل تقليب بالمعلقه و بعدين نحط ايدنا و نبدأ نبس العجين و نتأكد أن الدقيق كله شرب السمنه و بعدين نضيف اللبن و الخميره و نعجنها بس مش كتير  هنلاقي العجينه بدأت تمسك .
هنغطي العجينه نص ساعه و نسيبها ترتاح و بعدين نشتغل علطول.
هناخد قطعه من العجين و نكورها حسب الحجم اللي بنحبه كبير أو وسط أو صغير و نحشيها بالملبن و نقفل عليه كويس و نرصه في الصنيه و منضغطش على الكحكه عشان تطلع عاليه و شكلها حلو هنكتفي بضغطنا عليها بالطباعه و بعدين حسب الرغبه ممكن نستخدم المنقاش أو الطباعه و طبعاً الطباعه بتوفر وقت و مجهود و بيطلع كله نفس الشكل.

التسويه :
الكحك مش بيحتاج درجة حراره عاليه لأنها عجينه دسمه بتحتاج حراره هاديه عشان تستوي كويس من جوه و بره و يبقى لونه حلو  .
هندخله فرن دافي على درجة حراره ١٥٠ او ١٦٠ على الرف اللي في النص حوالي نص ساعه أو أكتر شويه و لو حسينا أنه لونه أبيض من فوق نولع الشوايه بس على الهادي برضو لحد ما ياخد لون خفيف و نحس أن الكحكه فوق و تحت نفس اللون و نطلعه من الفرن و نسيبه يبرد و منطلعش الكحك من الصواني غير لما يبرد عشان يمسك نفسه و ميتكسرش
 بجد طعم و ريحه و نعومه مش هتلاقوها عند أي حلواني
الف هناا

تعليقات

إرسال تعليق