السلام عليكم ..
النهارده جايبالكم طريقه ووصفه حلوة اوى كلنا بنحبها وولادك هيحبوها اوى ..
طريقة عمل دبابيس الفراخ المقرمشه :
اول حاجة بجيب دبابيس فراخ وبغسلها كويس جدا عشان الزفارة بملح وخل.. وبعدين بجيب سكينة رفيعة واجي تحت الجلد في اللحم كدة واشرحهم من كل حته عند العضم من تحت وفوق وبعدين هنفتحهم تحت الجلدعلشان منبوظش منظرهم في القلي.. نيجي للتتبيلة ولازم ننقعها فى التتبيله دى كذا ساعه او قبل بيوم بعد كده.. بنضيف لبن حسب كمية الفراخ يعني انا حطيت كوبايتين لبن ودوبت فيهم معلقة كبيرة دقيق ونزلت بيهم ع الفراخ وعليهم ملح وفلفل وبابريكا وبودرة بصل وتوم وكمون وكزبرة ناشفة وحبة بهارات جوزة الطيب بشرتها عليها دي بقى بتدي ريحة وطعم حلو اوى
بقلبهم كويس وبدخلهم التلاجة وكل ساعة بقلب فيهم.. نيجي لمرحلة القلي... نركز الفراخ نية مش مستوية انا نجيب طبق كبير فيه دقيق وعليه ملح ورشة فلفل وطبق تاني فيه حبة كورن فليكس او بقسماط وطحنته في الكبة بس منعمتهوش اووي خليته خشن شوية.. جبت الكورن فليكس سايب من العطار.. بصراحة الخطوة دي غيرت جامد من شكل وطعم الكنتاكي خلته مقرمش وطعم اكتر ولونه دهبي وجميل... زيت غزير في طاسة او حلة صغيرة وااخد القطعة من التتبيلة للدقيق وارجع تاني للتتبيلة وبعدين الدقيق وبعدين التتبيلة وبعدين الكورن فليكس وعلى القلي الخطوات دي كلها عملت طبقة جميلة وماسكة نفسها باامانة بالظبط زي كنتاكي بتاع برا المهم منستصعبش الخطوات وننفذها بالحرف.. النار في الاول بتكون عالية ولما انزل بالفراخ بهدي النار شوية وقرب مالفراخ تستوي هعلي النار بالتدريج وبجيب خلة وبدخلها في الفراخ وهي في الزيت وبختبرها لو طلعت دم يبقى لسة مستوتش... الطريقة دي تحفه والله والفراخ طالعة مستوية جدا وجميلة جدا والف هنا ..
تعليقات
إرسال تعليق