طريقة خبز التوست الاسمر الطرى وعيش السن للدايت والريجيم هبه ابو الخير

السلام عليكم ..

النهارده جايبالكم وصفه انما هتعجبكم اوى ..

وصفه كلنا بنشتريها من بره وبنحبها بس لاء هنعملها فى البيت ونوفر كمان ..

طريقة خبز التوست الاسمر والعيش السن

المقادير :

كوب ونص دقيق اسمر + كوب دقيق ابيض

لو مش متوفر اخلطي رده مع دقيق ابيض

٢٥جم زبده

٧جم ملح

١٥جم سكر

١٠جم خميره

٢٧٥جم ميه

معلقه كبيرة عسل اسود بتدى لون وطعم تحفه

الطريقه :

انابدات بالماء الدافئ ضفت له السكر والخميره والملح وكوب دقيق وقلبتهم كويس وسبتهم ١٠دقايق يتفاعلو

وبعدين نزلت بباقي المقادير وعجنتهم كويس

نغطي العجين ونسيبه يخمر ساعتين في مكان دافي

طريقة تشكيل التوست:

نقسم العجين 3 كور وناخد كل كره نفردها ونطبقها من الجنبين بعدين نفردها بسيط ونلفها رول

ونكرر كل ده فى كل الكور

هنسيبه يخمر تاني لحد ما يتضاعف

انا دهنت وشه لبن او ممكن ميه وتدخليه فرن ٢٠٠لمدة تلت ساعه

او ل ما يطلع من افرن غطيه بفوطه يهدا واقلبيه من القالب واستني لما يبرد وقطعيه شرايح واحتفظي به في الفريزر

طريقة تشكيل العيش السن:

نشكل العجين كور متساويه ونتركه يرتاح ربع ساعه

نرش الرخامه رده ونفرد كل كره دايره نرصهم علي صينيه مرشوشه رده

وتغطيه بقطعة قماش وتسيبيه يرتاح ساعه

وبعدين تسخني الفرن علي اعلي درجه ويكون جوه الفرن الصاج سخن جدا تخرجي الصاج ترصي عليه رغيف العيش وتحطي الصاج في ارضية الفرن لحد ما تلاقي الرغيف اتنفخ وقعره اخد لون حلو ارفعيه علي الشبك وشغلي الشوايه تحمري وش الرغيف

وبألف هنا ..