كيفية عمل البوريك بالسبانخ والجبنة جلاش بالسبانخ والفيتا فاطمة ابو حاتى

 السلام عليكم .

النهارده جايبالكم وصفة حلوة اوى وسهله ومفيده ومغذية وكلها فوائد

البوريك سبانخ بالجبنه :

جلاش بالسبانخ والجبنه الفيتا :

ندخل فى الموضوع عشان الوصفة دى بجد هتعجب ولادك لو مش بياكلوا سبانخ مطبوخه ان شاء الله هياكلوا جلاش بالسبانخ او بوريك السبانخ او رولات السبانخ ..

كلنا عارفين فائده السبانخ

يلا نشوف هنعمل ايه ..؟

كيفية عمل بوريك السبانخ بالجبنه ؟

هقواكم حالا ..

طريقة السبانخ :

هنجيب نبات السبانخ وننضفه ونقطعه ونغسله ونسيبه يتصفى شويه

وهنجيب طاسه فيها فصين توم ومعلقتين زبده ونشوح التوم واول ما نشم ريحته هننزل بالسبانخ تتشوح لحد ما تصفى مايتها خالص

ونركنها على جنب ..

هنشوح مكعبات فراخ مع زبده وملح وفلفل ونحطها ع السبانخ ونضيف 3 معالق كبار جبنة فيتا وموتزريلا ونحط كل الخليط على بعض ..

طريقة الجلاش 

هنجيب كوبيتين زبادى كبار وعليهم 3 معالق زبده ونص معلقه بيكنج بودر ونقلبهم مع بعض هنجيب ورقتين جلاش وندهنهم من الخليط

 ده كويس ونضيف السبانخ ونلف كده رول ونطبق ونرص فى صينيه مدهونه زبده

هنفضل نعمل كل الجلاش لحد ما نخلص كل الورق ..

ندخله الفرن على 180 مبياخدش وقت

طعمه تحفه والله وولادك هتاكله لان السبانخ طعمها مش ظاهر اوى 

ميكس الجبنه الفيتا والموتزريلا والفراخ حلو اوى معاه ..

وهنقولهم ده البوريك مش سبانخ عشان ياكلوة وتبقى توب شيف

والف هناا