كيفيه تخليل الليمون المعصفر المسلوق فاطمة ابو حاتى

 

السلام عليكم ..

النهارده جايبالكم وصفه حلوة اوى هتعجبكم وكلنا مش بناكل من غيرها بالذات فى رمضان وعزومات رمضان مين فينا يقدر يستغنى عن المخلل فى فطار رمضان ..

كيفيه تخليل الليمون المسلوق :

اولا هقولك ازاى تخللى لمون بدون ما يتهرى ويقعد معاكى فتره طويله بدون ما يبوظ منك وتبقى توب شيف ..

اولا هتشترى الليمون وقت ما يكون رخيص ويكون لونه اصفر وحجمه كبير او متوسط وقشرته متكونش ناعمه اوى عشان يستحمل ..

هتغسلى الليمون كويس ..

هتجيبى حله وتغلى مايه وتسقطى الليمون وتقلبى يادوب غلوة واحده بس وقلبى براحه عشان ميتخرمش منك ..

هاتى برطمان ازاز وعقميه وصفى الليمون وحطيه فى مايه بارده وغيرى المايه كل كام ساعه لمده يوم

هتجيبى مايه مغليه مبرده وتحطى فيها ملح وشطه وخل حسب الرغبه ..

رصى اللمون وقطعى فلفل حامى وصبى المايه ومعلقتين عصفر وحبه البركه وغطى الوش بزيت زيتون او اى زيت واقفلى البرطمان كويس

متفتحيش عليه الا لما تحتاجيه بيقعد بالشهور زى ماهو ده بقالو 4 شهور وهشيله لرمضان ان شاء الله ..

الف هنااا ..