كيفية عمل سويسرول شيكولاتة ببواقى الكيك فاطمة ابو حاتى

السلام عليكم ..

النهارده جايبالكم وصفه حلوة اوى هتعجبكم وسهله اوى وممكن نزينها بكذا حاجه زى ما تحبى ..

لوالكيكة باظت منك مترميهاش هنعمل بيها احلى سويسرول شيكولاته او كريمة طهى وتبقى توب شيف

كيفية عمل سويسرول شيكولاتة ببواقى الكيك :

المقادير:

2 كوب دقيق منخول وعليه معلقه بيكنج بودر ورشه ملح

2 بيضة وفانيليا

ربع كوب زيت

ربع كوب سكر

ربع كوب حليب

الطريقة :

هتحطى البيض والزيت والسكر فى الخلاط وبعدين حطى اللبن وضيفيهم على الدقيق وقلبى لحد ما القوام يشبه الكيك

هاتى صينيه مستطيله وحطى ورق زبده وافردى العجينه متكونش عاليه واخبزيها فى فرن 180 لحد ما تستوى واختبريها بخله الاسنان لو طلعت نضيفه يبقى استوت

اول ما تخرج هتطلعيها وتلفيها رول براحه متخافيش مش هتتقطع ولفيها فى فوطه نضيفه وسيبيها تبرد كام ساعه

وحضرى الحشوه :

كريم شانتيه او مربى

افتحى الرول واحشيه زى ما تحبى كريم شانتيه او مربى او تسخنى كريمة طهى وتحطى معاها قالب شيكولاته وزوقيها بالفراوله او زى ما تحبى ..

ملحوظه مهمه :

لو كان عندك بواقى كيك  او كيكة باظت منك متخافيش هنتصرف ونحلها مش هنرميها هقولك تعمليها ازاى

هتفرفتى الكيك كويس اوى وتحطى عليه علبه كريمة طهى حلويات او سيرب خفيف لحد ما تبقى زى العجينه فى ايدك

هتجيبى رول استرتش وتفرديه فى صينيه وتحطى الكيك وتطبطبى لحد ما تساويه واحشيه بردو زى اى كيكه بالكريم شانتيه

ولفى السويسرول بالاسترتش رول وحطيه فى التلاجه كام ساعه وبعد كده زوقيه عادى من فوق بالشيكولاته المبشورة والفراولة

الف هناا ..