طريقة عمل وتسوية اللحمة فى البرطمان الازاز العزومة فاطمة ابو حاتى

 

السلام عليكم ..

النهارده جايبالكم وصفة انما ايه حلوة اوى وجديده هتعجبكم اووى ..

اللحمة في البرطمان الإزاز :

وطريقة تسوية اللحمة المظبوطة

 ومن غير ميه ولا أي حاجه طعم مختلف ريحه جباره مش هوصف كثير ندخل ع المقادير ..

المقدار اللي في الصوره ده كيلو لحمة أخد برطمان كبير بتاع العسل وبرطمان صغير من بتاع الصلصه.. 

لحمه اتشطفت مره واحده مبغسلهاش كثير ضفت عليها رشة فلفل اسود ورشه ملح صغيره. جبت بصلايه وطماطمايه ومعلقه صلصه وعليهم رشه كسبره ورشه فلفل اسود ورشه  بهارات لحمه ورشه ملح ضربتهم في الكبه. . جبت البرطمان ضفت فيه طبقه بصل بطماطم  وفوقها طبقة لحمه وفوقها طبقه بصل بطماطم لحد ما وصلت للآخر منكبسهاش وغطيت بورقه زبده الأول وعليها ورقه فويل دخلت فرن سخن حراره 200  لمدة نص ساعه وبعدها هديت الحراره ل180لمده ساعه واستوت بالشكل ده.. انا  بقى سبتها نص ساعه كمان على الساعه ونص لاني بحبها دايبه وتقدم مع ارز بالشعرية بتبقى تحفة

الف هناا ..