كرشة بالحمص والصلصة العزومة فاطمة ابو حاتى

السلام عليكم ..

النهارده جايبالكم اكلة انما ايه حلوة اوى بس مش كل الناس بتحبها وهى مرتبطة اكتر بعيد الاضحى كل سنه وانتم طيبين النهارده هقولكم على طريقه سهله وحلوة ..

الكرشة بالصلصة :

التقاطيع والفشة :

بتجيبي الفشة والكرشة طبعا بيتغسلوا كويس جدا وتنقعي الكرشة في مية وملح وخل وليمون ودقيق وتغسليها لحد ما ريحتها تبقي كويسة وتسلقيهم في مية ومعاها بوكيه جارنيه المكون من بصل وجزر وفلفل اسمر وورق لاورا وحبهان بتستوي وهي قطع كبيرة وبعدين تلت ارباع سوي وتطلعيها تبرديها وتقطعيها قطع صغيرة وتكوني محضرة الصلصة بتعمليها ببصلة. وراس توم وطماطم ولما تتسبك تزوديها وتحطي الكرشة والفشة بس خلي بالك علشان الكرشة بتاخد سوي اكتر من الفشة وبتكوني ناقعة الحمص بتاع الطبيخ المجروش مش السليم بتاع الكشري ولما بينفش بتحطيه علي الصلصة يستوي وتحطي بهاراتك وملحك وكمون وفلفل اسمر وممكن تحطي واحد فلفل اخضر او احمر حراق وكله يستوي وبيتاكل مع رز ابيض او بالشعرية او تتغمس بالعيش وبالف هنا