طريقة عمل أكلير بكل أسراره فاطمة ابو حاتى

 السلام عليكم ..

النهارده جايبالكم وصفة إنما ايه حلوة اوى وهتعجبكم ..

طريقة عمل الأكلير :

المقادير: 

كوب دقيق 

كوب ماء

نص كوب زبدة حوالي١٠٠جرام 

 ٣بيضات

معلقة سكر +فانيليا+ ملح 

الطريقة:

هنرفع على النار الماية ونضيف ليها الزبدة ومعلقة السكر وأول الخليط مايغلى ننزل بالدقيق المضاف له ذرة الملح  ونوطى النار ونقلب كويس حوالى ٣ دقايق علشان الدقيق يستوى ويختفى تماما ....

ونترك الخليط  حتى يبرد تماما 

ثم ننزل عليه بالبيض المضاف إليه الفانيليا ..واحدة واحدة مع التقلب المستمر حتى يختفى البيض تماما

نبدأ نشكل الإكلير صوابع باستخدام كيس الحلوانى ونرصه فى صينيه مدهونة زيت خفيف ...ونسيب مسافة بين الوحدات

التسويه :

سبب أساسى لنجاحه .بنخبزه على الشبكة فى منتصف الفرن على درجة (٢٠٠) حوالى (٢٠)دقيقة ...وبعدين ننزل الحرارة (١٧٠)لمده (١٥)دقيقة 

علامة السوى إنه ينتفخ ويبدأ يحمر ...كل ده تشوفيه من زجاج الفرن 

ملحوظة :

اوعى تفتحى الفرن خلال فترة الخبز أو حتى لما تقفلى عليه ....لازم الفرن يبرد عليه تماما وإلا حيهبط منك ويروح تعبك عالفاضى  متفتحيش عليه غير لما تحسى إن الفرن برد خالص

التزيين :

لما يبرد خااالص إحشيه بقى بالكريم باتسيير أو كريمة الشيكولاتة 

الكريم باتسيير:

المقادير :

٢ كوب لبن _ ٢بيضة (كاملة )_معلقتين ونصف كبار نشا _ ٥معالق سكر (أو حسب الذوق الشخصى ) _معلقة صغيرة زبدة _فانيليا _ذرة ملح 

الطريقة :

فى بولة هنكسر البيض ونضيف له الفانيليا ونضرب بشوكة وبعدين نضيف لهم النشا ونضرب بالشوكة لنتخلص من أى كلاكيع ونسيبهم شوية 

هنحط اللبن على النار يغلى ونضيف له السكر وندوبه كويس ...لما اللبن يغلى ...نطفى عليه وناخد منه ربع كوب 

الربع كوب لبن المغلى هأنزل بيه مع التقليب على خليط البيض والنشا ونقلب كويس قوى ....(ويفضل تصفية هذا الخليط للتخلص من أى كلاكيع )

هنرجع كسرولة اللبن تانى على نار هادئة ...وننزل عليه بالخليط اللى (صفيناه )..فى صورة خيط مع التقليب المستمر (اوعى تبطلى تقلبى لغاية لما تلاقى القوام تقل معاكى )...ضيفى بقى معلقة الزبدة وقلبى علشان تدوب ...خليه شوية على النار مع التقليب وبعدين اطفى عليه 

فى لحظتها غطيه بكيس بلاستيك بحيث يلاصق سطح الكريم باتسيير علشان الوش ميكونش (قشرة )

سبيه لما يهدأ خالص وحطيه فى التلاجة يبرد لوقت استخدامه (اوعى تستخدميه سخن )

التوبينج :

الطبقة اللى بنغطى بيها الإكلير .كريمة الشيكولاتة ...وممكن نحشى بيها كمان 

المقادير :

كوب لبن _كوب سكر _نصف كوب كاكاو خام _كوب زيت ذرة (ممكن منستعملوش كله )

فى الخلاط :

هنضرب اللبن مع السكر مع الكاكاو كويس قوى علشان السكر يدوب ...وبعدين أفتح الخلاط من فوق وأنزل بالزيت على شكل خيط لغاية لما القوام يتقل ...نفضيه فى علبة ونحطه فى التلاجة 

طريقة الحشو :

بعد الإكلير مايبرد خاالص بنفتحه من الجنب كله مرة واحدة بسكين مشرشر 

هنحشى كل واحدة باستخدام معلقة صغيرة بالكريم باتسيير (وممكن أعبى الكريم فى كيس حلوانى واحشى بيه

آخر حاجة حنمسك كل واحدة ونغطيها بصوص الشيكولاتة 

هنحطه فى التلاجة ساعة وبعدين نزوق الوش بقى بمكسرات أو شيكولاتة فارماسيل أو شيكولاتة شيبس ....وممكن منعملش صوص الشيكولاتة ونرش عليه سكر بودرة 

ملحوظة

يفضل نسوى الإكلير فى الومنيوم لأن نجاحه فى درجة الحرارة العالية فى الأول ..

الف هنا ..