طريقة عمل كبده مقليه بالرده فاطمة ابو حاتى

السلام عليكم ورحمه الله وبركاته ..

النهارده جايبالكم وصفة إنما ايه حلوة اوى وهتعجبكم ..

كبده بالرده :

المكونات :

نص كيلو كبده شرايح بانيه 

عصير 3 لمونه و هنحتفظ بالقشر 

ربع كوب خل .. معلقه صغيره من ملح فلفل كمون كسبره ناشفه 

2بصله مبشوره هنحط عليها شويه ملح و نسيبها شويه وبعدين نعصرها ناخد مايتها بس 

توم مفروم ناعم اوى او توم بودره 

3كوبايات مايه 

الطريقه :

هناخد الكبده نحطها ف 3 كوبايات المايه وعليها رشه ملح و قشر اللمون والخل ونسيبها على مانحضر التتبيله 

الخطوه دى اللى مش بيحب يحط الكبده ف مايه او يغسلها براحته بس انا عملتها و طلعت حلوه اوى مش زفره 

هناخد ماية البصل و التوم المفروم ناعم اوى و عصير اللكون و التوابل اللى قولنا عليها فوق 👆 ونقلبهم كويس

ناخد الكبده واحده واحده نطلعها على مناديل مطبخ وننشفها كويس و بعدين واحده واحده نحطها ف التتبيله و نتاكد ان التتبيله وصلت لكل الكبده و نسيبها ف التتبيله مش اقل من ساعتين 

ف رده ناعمه هنغلف الكبده و نضغط عليها بالرده و ندخلها التلاجه نص ساعه قبل القلى او 10 دقايق بالفريزير لو مستعجلين 

ف زيت غزير هننزل الكبده و نخلى النار هاديه بس لا هى هاديه شمعه ولا هى عاليه اوى و نسيبها تاخد لون متنشفهاش عشان تطلع حلوه 

عشان الكبده متكشش و لا تلف لما تنزل الزيت هنشيل حته الجلده الرقيقه اللى بتبقى عالحرف كده زى الحرف بتاعه الجبنه الفلمنك كده 

الف هنا ..