طريقة عمل كباب حله بالبصل المكرمل فاطمة ابو حاتى

السلام عليكم ورحمه الله وبركاته ..

النهارده جايبالكم وصفة إنما ايه حلوة اوى وهتعجبكم ..

كباب الحله :

اهم حاجه واحنا بنشتري اللحمه من الجزار نقوله ان احنا هنعملها كباب حله عشان يديهالنا حته طريه او نقوله هاتها من السن ..

كباب الحله الاصلي مش بيتحطله غير ملح وفلفل بس لو بتحبى البهارات حطىاللى بتحبيه ..

 المقادير :

معلقه سمن بلدي

كيلو لحمه

كوب شوربه او ميه سخنه

نص كيلو بصل فصين توم

ملح وفلفل

بهارات لحمه او زي ما تحبي ممكن تحطي لوري وحبهان وقرفه وكبابه صيني 

الطريقه :

هنحط حله علي النار فيها معلقه سمنه بلدي واول ماتقدح ننزل بالبصل المتقطع وعليه رشه فلفل عشان الريحه تهفهف يتشوح ويغير لونه ننزل بالتوم وبعديه اللحمه المتقطعه قطع صغيره ونسيبها لحد ما تاخد الصدمه وتتحول للون البني الجميل نهدي النار عليها وننزل بحبه شوربه ونغطي ولما تشربهم نزود تاني لحد متستوي وبعدين نحط الملح اخر حاجه عشان بياخر السوا ونحط رشه فلفل وكده كباب الحله تمام هنجيب حته ورق فويل او طبق المونيوم ونكون مولعين حته فحمه وعليها قطعه سمنه او دهن اونقطه زيت ونروح حاطينها ف الحله ومغطيين عشر دقايق وافتحي عليها وشمي احسن ريحه كباب ع الفحم ..

أنا بحب اقدمها مع ارز ابيض ..

ألف هنا ..