طريقة عمل الجبنة القريش والبراميلى في البيت فاطمة أبو حاتى

 السلام عليكم ورحمه الله وبركاته..

النهارده جايبالكم وصفة إنما ايه حلوة اوى وهتعجبكم كلنا بنحبها كبار وصغار..

الجبنة القريش :

 كيلو لبن فقط وبدون اي اضافات تانية

اعملوها في البيت بتطلع حلوة جدااا

الطريقة دي متجربة وبعملها 

المقادير :

كيلو لبن

 كامل الدسم ولسه جاي طازة ومن غير مانغليه ماتقلقوش البكتريا اللي هاتتكون نافعة وبتقضي علي اي ميكروب فيه هاجيب طاجن  وادفيه علي البوتجاز شويةواحط اللبن فيه واغطيه واسيبه في مكان دافي ماجيش ناحيته خالص نهائي لتاني يوم يعني في نفس الميعاد انا حطتها في الطاجن الساعة ٢ الظهر وفتحت عليها ٢ الظهر تاني يوم

هلاقيها ماسكة وكلها قطعة واحدة اجيب قطعة شاش او قطعة قماش كتان اوقطن واحطها في مصفاة واحط تحت المصفاة طبق غويط عشان هاينزل فيه الشرش من الجبنة وافضي خليط الجبنة علي الشاش والم الشاش بايدي علي الجبنة كويس واسيبها لغاية ماتصفي كل المية اللي فيها (الشرش) وبعد كدا اجيب استرتش اوكيس بلاستيك واحط فيه خليط الجبنة وابرمه رول وعشان اعمل الخطوط اللي بتدي شكل الحصيرة رصيت عصيان الشيش طاووق علي الكيس قبل محط الجبنة وبعد كدا برمته رول وادخله التلاجة ولما يمسك نفسه ااقطعه  لو تحبي ترشي رشة ملح عليها علي حسب تقديرك انا مش بحط ملح بحبها من غيره وكدا الجبنة جاهزة للاكل الف هنا ..