طريقة عمل وتخزين صلصه الطماطم الشيف فاطمة ابو حاتى

 السلام عليكم ورحمه الله وبركاته..

النهارده جايبالكم وصفة إنما ايه حلوة اوى وهتعجبكم..

طريقة تخزين صلصة الطماطم:

بجيب طماطم تكون حمرا واغسلهم واقطعهم نصين واولع عليهم لمدة ساعة ونصف من غير ما نزود ميه هى هتنزل مايتها لحد ما تتسبك ونطفى ونسيبها تبرد وبعدين نضربها فى الخلاط ونولع تانى على نار هادية ونحسب ساعة ونص بعد الغليان وقبل ما اطفى عليها بربع ساعة احط الاتى ..

معلقة صغيرة سكر لكل كيلو يعنى عشر معالق سكر على العشرة كيلوا طماطم

معلقة صغيرة ملح ليمون على العشرة كيلو

برطمان واحد صلصة هاينز الصغير ٣٠٠جرام تقريبا على العشرة كيلو

واهم خطوة تكونى مجهزة برطمنات زجااااج مش بلاستيك وتكون نظيفة وناشفة مفيهاش ذرة مية 

نعبى الصلصة وهى متولع عليها وتملى البرطمان وتسيبى نص سنتى وتقفلى فورا الغطاء هيعمل تكة انه بكدة اتبرشم وتشيلى البرطمانات فى اى مكان فى البلكونة او تحت سرير اى مكان ..

السكر وملح الليمون دول مواد حافظة طبيعية بس الفرق انك لما بتفتحى برطمان صلصة وتشيلى الباقى فى الثلاجة مش بتحطى زيت على الوش ومش بتعفن والله عن تجربه واحلى من الجاهزة ..

ألف هنا..