طريقة عمل قوالب الكنافة بالكاسترد والنوتيلا فاطمة ابو حاتى

السلام عليكم ورحمه الله وبركاته..

النهارده جايبالكم وصفة إنما ايه حلوة اوى وهتعجبكم..

ورمضان كريم 🌙

قوالب الكنافة :

الطريقة :

نص كيلو كنافة بتحطيه ف الفريزر من قبلها علشان تبقى سهل تتكسر

معلقتين كبار سكر بودرة

كوباية سمنة بلدي بتسيحيها بس مش بتسخن يعني

بتفركي الكنافة جاامد أو تضربيها ف الكبة وتضيفي عليها معلقتين السكر البودرة

مش بنحط السمنة.. هتحطيها بعدين ما تقلقيش 

وتقلبيهم كويس جدااا

بتجيبي قوالب سيلكون على شكل نص دايرة أو معلقة معيارية اللي هي بتكون نص دايرة كدا

وتحطي الكنافة وتكبسيها جامد.. بتحطيها ف الفرن على درجة حرارة هادية لمدة 10 دقايق هتنشف وتعضم كدا علشان السكر البودرة هيخليها تمسك ف بعضها

تطلعيها من الفرن تقلبيها ف صينية بحيث تكون القبة بتاعتها دي لفوق.. وتسقيها بالمعلقة كدا بالسمنة السايحة وتدخليها الفرن تاني  بردو على درجة حرارة هادية لحد ما تاخد لون حلو كدا

تطلعيها وهي ف الصينية بنفس المعلقة اسقيها شربات

الشربات بارد أو دافي مش سخن

ولما تبرد حطي عليها كريمة أو كاسترد.. قشطة.. نوتيلا.. زبدة لوتس .. كراميل.. أي حاجة انتي عاوزاها وحطي مكسرات أو ورق دهب.. يعني التزيين دا زي ما تحبي

والف هنا ..