طريقة عمل طاجن بامية باللحمة يجنن

السلام عليكم ورحمه الله وبركاته..

النهارده جايبالكم وصفة إنما ايه حلوة اوى وهتعجبكم كلنا بنحبها كبار وصغار..

طاجن بامية باللحمة :

 المقادير :

كيلو لحمة كندوز مكعبات

بامية خضراء  متقمعة و مغسولة

بصلة صغيرة مفرومة

فصين توم

قرن فلفل احمر حامي 

معلقتين صلصة

عصير طماطم (مضروبة ف الخلاط و متسبكة

ليمونة 

معلقتين سمنة

ملح فلفل اسود رشة جوزة الطيب

معلقة صغيرة سكر (بتعادل حموضة الطماطم و الصلصة

 الطريقة :

١.سلق اللحمة :

ف حلة ع النار نحط معلقة سمنة و فص مستكة و ننزل باللحمة تتشوح الحركة ديه بتخلي اللحمة طرية و juicy مش مفتلة أو بتشد 

و بعد كده ننزل بالمياه المغليه و نشيل أي ريم من علي اللحمة و بعد كده نحط بصل جزر كرفس حبهان ورق لورا فلفل اسود حصي و عود قرفة بيمنع أي زفارة و نسيبها لحد ما تستوي ٤/٣ سوا

٢.نيجي بقا للبامية ف حلة نحط سمنة و بصلة المبشورة و فص توم و قرن فلفل احمر و البامية و نشوحها كويس و عليها عصرة ليمون عشان متمزلقش

و بعد كده نحط الصلصة و نقلب هنشم ريحة جبارة  و ننزل بعصير الطماطم و شوية من شوربة اللحمة تاخد غلوة و بعد كده نحط اللحمة و مكعب مرق و نظبط ملح فلفل اسود بابريكا رشة جوزة الطيب و معلقة صغيرة سكر و بعد كده نحطهم ف طاجن فخار و علي الفرن و ف الاخر أنا بحب أعملها طشة زي الملوخية و ديه اختياري بمعلقة سمنة بلدي و فص توم و كزبرة ناشفة و نقدمها مع أرز بشعرية كتير و بتينجان مخلل ..

الف هنا..