طريقة عمل عصير الخوخ رانى وكمبوت الخوخ وتفريزة

السلام عليكم ورحمه الله وبركاته..

النهارده جايبالكم وصفة إنما ايه حلوة اوى وهتعجبكم كلنا بنحبها كبار وصغار..

موسم الخوخ  يبقي نعمل راني خوخ  تحفة عصير منعش اوي من غير مواد حافظه واسهل طريقة تحضير عملت من كيلو الخوخ ٢ لتر عصير واكتر 

طريقة عصير راني :

الطريقة:

اول حاجة هنجيب الخوخ البلدي 

هنغسل الخوخ كويس ونحطه ف حله ونضيف عليه مياه ونرفعه ع النار يغلي ويستوي حوالي ١٥ ل ٢٠ دقيقة وبعد كدة نطفي ونشيل الخوخ من المياه ونستني يبرد شويه ونشيل البذر من الخوخ ونقشره ونحطه في الخلاط مع شويه من مياه السلق فيها كل اللون والطعم ونضيف سكر حسب الرغبة انا استخدمت حوالي كوب سكر لان الخوخ مكنش مسكر ونضربه كويس فالخلاط لو مقشرتهوش هتصفوه ف هيكون مره واحدة مش هنقعد نقشر بقي واحدة واحدة لان في خوخ رخم مش بيتقشر بسهوله المهم ضربنا العصير واتصفي او لا نسيبه ع جنب ثواني ونجيب بقي ٣ او ٤ خوخات كبار ودول بقي لازم نقشرهم ونقطعهم صغير اوي ودي بقي قطع الفاكهة او الحبيبات اللي جوا العصير بعد م نقطعهم نحطهم ع باقي مياه السلق وعليهم العصير اللي فالخلاط بس ندوق كدة ونشوف اخبار السكر ايه وكمان لو عايزين نخفف العصير شويه نزود شويه مياه ونولع النار تاني العصير يغلي شويه وقطع الخوخ تستوي وبس هيكون جاهز معانا وتحفه ريحة وطعم جميل اوي  نطفي ونسيبه يبرد خالص وبعد كدة يتعبي ف ازايز ويتحط فالتلاجة او فالفريزر لو عاملين كميه بيقعد كتير كل م نحتاج نطلعوا يفك ونشربوا بالف هنا جربوه هيعجبكم اوي

ملحوظة :

لو لون الخوخ مش احمر وطلع لون العصير مش زي الجاهز ممكن نضيف عليه فالخلاط نقطه لون طعام احمر 

ألف هنا..