تجربتي مع الشوكة العظمية مسمار القدم وعلاجها الحمد لله

 السلام عليكم ورحمه الله وبركاته..

النهارده هحكيلكم عن تجربة مختلفة عن الأكل عشان اقدر اساعد اى واحده اتعرضت لنفس الحاله ..

تجربتي عن الشوكة العظميه وعلاجها :

في البداية انا تعبت جدا لحد ما وصلت للتشخيص انها فعلا شوكه عظميه (مسمار القدم)

عملت في الاول تحاليل نقرس واملاح وكل التحاليل كانت النسب كويسه ..

لكن الالم بيزيد .. عملت أشعة على الكعب واتشخصت

شوكة عظميه 

روحت لكذا دكتور بكذا بروتوكول علاج اللى فى الاخر كلها علاج التهابات ومسكنات ..

الالم بيزيد ومفيش تحسن اخد العلاج ابقى تمام يخلص يزيد الالم ..

ابتديت مقدرش امشى على رجلى نهائى حتى مع نعل سيليكون  وكوتشى مريح ..

فى يوم كنت فاقدة الامل كده حد سال في جروب منطقتى عن دكتور عظام يكون كويس ..

لقيت الناس كلها بتشكر في واحد اخدت رقمه منهم وكلمته ورد عليا بدون سابق معرفه ..

حددت ميعاد واتوكلت على الله واخدت اشعاتى وتحاليلى وروحتله ..

سمع منى كل اللى حصل وقالى محتاجه حقنه كورتيزون مع حقنه بلازما و تتحقن في الكعب مكان الالم ..

كنت سمعت عن الكورتيزون لكن البلازما لا ..

فهمنى أنه هياخد دم منى وهيتفصل فى المعمل وهنحقن البلازما ..

كنت خايفه جدا جدا بس هو طمنى ..

اتوكلت على الله وحقنت والحمد لله دلوقتى احسن من الاول بس لسه فيه الم بعد مرور 3 اسابيع ..

مواظبه على كمدات ماء ساخن ثم بارد ثم ساخن كذا مره واخر مره ساخن وبدهن جيل مسكن اى نوع عندك ..

دى تجربتي بما يرضي الله يمكن اساعد حد ياخد القرار وخايف زيى ..

الم الحقن اهون من الم الشوكه ..

بعد شهر الالم بسيط واحيانا بيزيد مع الوقفه والمجهود بردو محتاجه للراحه ..

ملحوظه اخيره : عملت حقن للرجل التانيه بعد شهرين والنتيجه الحمد لله مرضيه جدا ..

دعواتكم بالشفاء العاجل..