طريقة عمل طاجن ورق عنب بالكوارع ينزل في القلب

السلام عليكم ورحمه الله وبركاته..

النهارده جايبالكم وصفة إنما ايه حلوة اوى وهتعجبكم كلنا بنحبها كبار وصغار..

الاكله دى بتنزل في القلب مش المعده ..

الطاجن ده  بتروحو تدفعو في رقم محترم من بره 😎

جبتلكو انا طريقته بقي كما قال الكتالوج 😋😋 يلا نشوف طاجن وداع يادنيا وداع بيتعمل ازاي 🤣🤣🤣

طاجن ورق عنب بالكوارع :

الطريقة والمقادير:

ورق عنب مسلوق

كوب رز

شبت كزبره بقدونس مفرومين ناعم

بصله مبشوره

طماطم مبشوره

صلصه طماطم

ملح وفلفل

زيت

هاتي بوله حطي فيها رز وخضره وتوابل وبصل وجماطم وشويه صلصه وحبه زيت حلوين وقلبي كله سوا وابتدي احشي المحشي ورصيه فى الطاجن وابتدي جهزي المرقه ال هنسقي بيها 

حله فيها شوربه الكوارع وزودي عليها شويه عصير ليمون وفص واحد توم ومعلقه ك صلصه طماطم واديهم غلوه واسقي المحشي وخليه يغلي على النار خمس دقايق وبعد كده هدي النار ٢٥ ل ٣٠ دقيقه واقفلي وتعالي نجهز الكوارع بقي 

طاسه فيها شويه زيت وزبده نزلي توم مفروم دقيقتين ونزلي فنجان خل ورشه ملح وفلفل وكمون وشطه وبعدها نزود معلقه ك صلصه وربع كوب عصير طماطم متسبك وقرن فلفل حامي غلوه واحده ونزلي الكوارع المخليه ونقلب ٣ دقايق وبسسسس حطي الدلع ده كله على وش ورق العنب

لو هتسوي ورق العنب فى طاجن هنعمل نفس الخطوات بس نغطي الطاجن بورق فويل ويدخل فرن سخن على ١٨٠ الرف الوسط لمده ٤٠ دقيقه 

عشان الكوارع تطلع حلوه افركيها بملح خشن ودقيق وبعدها زودي ميه وعصير ليمون ورشه جنزبيل وانقعيها ساعتين وبعد كده صفيها كويس وهاتي حله فيها شويه زيت نزلي حبهان مستكه وورق لورا وشوحي الكوارع كويس ٥دقايق بعد كده زودي طماطم كرفس بصل وشوحيهم مع رشه فلفل اسود وبعدها نزلي ميه مغليه واول ماكله يغلي كويس هدي النار لمده ساعتين لو حله عاديه وساعه واحده لو حله بريستو وبسس كده تستوي طلعيها وفصصيها ..

الف هنا ..