طريقة عمل فطائر الجبنة للسحور والعشاء بطريقة نادية السيد

السلام عليكم ورحمه الله وبركاته..

النهارده جايبالكم وصفة إنما ايه حلوة اوى وهتعجبكم..

تنفع للعشاء وتنفع للسحور كل سنه وانتم طيبين و رمضان كريم 🌛

فطائر الجبنة :

الطريقة والمقادير:

كوب حليب دافئ

ملعقة كبيرة زبادي في درجة حرارة الغرفة

بيضة في درجة حرارة الغرفة

ملعقتين كبار سكر

ملعقة كبيرة خميرة فورية

٣ كوب دقيق

نصف معلقة صغيرة ملح

ربع كوب زيت

الطريقة:

هنضرب اللبن مع الزبادي و البيض بالمضرب اليدوي العادي و نضيف بعدها السكر و الخميرة الفورية و هنقلب كل حاجة مع بعض و نسيب الخميرة شوية عشان تفور و نتأكد انها شغالة.

بعد كدا هنحط الدقيق عليه الملح و نقلب المكونات الجافة مع بعض و بعد كدا ننزل بيها على المكونات السايلة بالتدريج عشان الدقيق ميزدش مننا لحد ما يتكون عندنا عجين و نعجن بإيدنا و بعدها هنضيف عليها الزيت و نلم العجين مع الزيت و نعجنها لحد ما تطرى و تشرب الزيت

و بعد كدا نغطيها و نسيبها تخمر في مكان دافئ لحد ما يتضاعف حجمها.

نحضر الحشو بعد كدا عبارة عن جبنه فيتا و بقدونس و حبة البركة و ممكن نضيف شوية صغيرين نشا عشان الجبنة متسحش في الفرن و ممكن نستغنى عن النشا عادي

نشكل العجين على شكل كون الايس كريم و نضيف جواه الجبنة و نحطهم جنب بعض على شكل وردة و نسيبهم بعد ما نخلص يتخمروا للمرة التانية و يتضاعف حجمهم و بعدها نجيب صفار بيضة عليها شوية حليب و ندهن بيها الوش و نضيف عليه حبة البركة او السمسم و بعدها ندخلهم الفرن على درجة حرارة ١٨٥ لمدة ٢٠-٣٠ دقيقة او لحد ما يستوي و الوش يحمر 

و ممكن بعد ما نتأكد انها استوت نفتح الشواية تحمر 

الوش.

و اول ما تخرج ندهن الوش زبدة سايحة و نغطيها عشان تتطرى ..

ألف هنا..