طريقة عمل البرجر البيتى زى المطاعم العزومة فاطمة ابو حاتى

 


السلام عليكم ..

النهارده جايبالكم وصفة انما هتعجبكم اوى وكلنا بنحبها كبار وصغار ..

البرجر البيتى :

المقادير :

نص كيلو لحمه مفرومة 

نص كوب فول صويا منقوع ومتصفي كويس 

٣ بصلات مفرومين ونشوحهم علي النار لحد ما يصفر 

كيس خلطة البرجر من ماجي 

الطريقة :

هنقلب كل المكونات دي مع بعض كويس وبعدين نشكل البرجر بغطا برطمان هنجيب الغطا ونحط عليه كيس بلاستيك ونشكل عليه 

نحط قطع البرجر في طبق وبينهم ورق أبيض و كيس بلاستيك وندخلهم الفريزر


تعالوا بقي نعمل الصوص

٢ معلقة كبيرة مايونيز 

ربع كوب لبن 

٢ معلقة كبيرة مستردة 

٣ معلقة كبيرة باربيكيو 

نص معلقة دبس رمان أو صويا صوص وممكن الاستغناء عنها  

رشة فلفل اسود 

ونقلب كله مع بعضه كويس جدا وع التلاجه علي طول 

مواضييع تهمك :

نعمل بقي صوص الجبنة 

نص كوب لبن 

معلقة ممسوحة دقيق 

٣ قطع جبنه مثلثات 

شريحتين جبنة شيدر 

شريحتين جبنة رومي 

شوية جبنة موتزاريلا 


واي جبن موجودة عندك حطي ماعدا الجبنه البيضا والقريش طبعا 


وممكن جدا تكتفي بنوع جبنه واحد علي فكرة بس كل ما تحطي جبنه كل ما كان طعمها احلي 


هنقلب كل ده كويس لحد ما الدقيق يدوب خالص وبعدين احطهم علي النار  لحد ما الجبن تسيح والقوام يتقل نحط عليها معلقتين مستردة ونقلب ونهدي النار خااااالص عليها 


نقطع بقي اييييه 

طماطم 

بصل 

خيار مخلل 

خس كابوتشا 

كده بقت كل حاجه جاهزة 


نشوي البرجر في طاسة تيفال بنقطة زيت 

وبعدين نجيب العيش الكيزر 

نحط الخس والخيار المخلل وبعدين البرجر وبعدين الطماطم والبصل وبعدين الصوص المدخن وبعدين صوص الجبنه  ..

الف هنااا ..

تعليقات

إرسال تعليق