طريقة محشى الكرنب والتسوية السليمة والمقادير المظبوطة جدا

السلام عليكم ..
النهاردة جايبالكم وصفة انما ايه كله بيحبها وهقولكم على كل التركات اللى تخليه جميل
محشى الكرنب
المكونات :
كرنبة _أرز مغسول _خضرة (٢شبت- ٢بقدونس )
حوالى كيلو ونصف طماطم _تلات بصلات كبار _ملح _فلفل _كمون _بهارات  _سمن _زيت _شوربة _فلفلة رومى حمراء (باردة )_معلقة صغيرة سكر
الخلطة:
بضرب الطماطم مع البصل مع الفلفلة الحمراء فى الخلاط واحطه على النار  واسيبهم يتسبكوا على نار هادية خالص...لما كل الماية تتبخر وحجمهم يقل فى الحلة ..أطفى عليهم وأضيف معلقة السكر والسمنة والزيت وأقلبهم بعيدا عن النار  وأسيب الحلة تبرد خالص

أغسل الخضرة كويس قوى  وأصفيها من الماية وأقطعها  وادعكها بالملح والفلفل والكمون وبهارات المحشى

 أضيف الخضرة لتسبيكة الطماطم الباردة وأقلبهم كويس

أغسل الأرز وأصفيه ..وأضيفه للخليط السابق ...لو لاحظت إن المادة الدهنية قليلة أزود شوية زيت

بخلع الكرنبة بالراحة خالص (واطول بالى علشان الورق ميتقطعش)وأخلص الورق من بعضه ورقة ورقة

ونصيحة منى بلاش طريقة تقطيع الكرنبة لأربع أقسام وتنزيل كل ربع فى الماية السخنة ...سامحونى طريقة فاشلة وبتهدر ورق كتييير

 بأنزل الورق ورقة ورقة  فى ماء مغلى مضاف اليه معلقة سكر وكمون  (مبحطش ملح علشان الورق ميتهريش)...يادوب أغطس الورقة وأطلعها  على ماية ساقعة( علشان اوقف عملية السلق)

بأحضر الحلة اللى ححشى فيها وابطنها كويس بالورق الاخضر

مواضييع تهمك :
خليه نحل بصوص الجبنه والزعتر حكايه
طاجن بطاطس بيوريه باللحمه المفرومه والبشاميل يجنن
فراخ مشوية فى الفرن احلى من بتاعت برا
طريقة تفريز كل الخضار والفاكهه لرمضان
بوريك بالجبنة زى بتاع الافران بطريقة فاطمة ابو حاتى
أبدا أحشى (بأحشى على طبق)وارص فى الحلة وازنق الصوابع جنب بعض علشان ده بيخلى الصوابع متفكش وأول صف من تحت بيكون الورق الأخضر النظيف المغسول

.لما بأخلص الحشو ...بأغطى الحلة ببواقى الورق اللى عندى وأحط طبق مسح على الوش علشان لما أسقى المحشى بالشوربة وأثناء الغليان الصوابع ماتفكش ولا الأرز يخرج

بأجهز الشوربة اللى حأسقى بيها (شوربة مضاف ليها معلقة صلصة ومعلقتين من تسبيكة الطماطم اللى عملتها للمحشى )وأظبط الطعم بإضافة الملح والفلفل والكمون وأغلى الشوربة كويس قوى

أنزل بالشوربة على الطبق المسطح ويادوب الشوربة تظهر بمستوى الطبق ..وبحاول (أميل) الحلة فى كل اتجاه  علشان اتأكد ان الشوربة تخللت الصوابع من تحت

وعلى نار عالية  اول عشر دقايق لغاية لما أسمع (صوت الغليان)  بأحط الحلة على صاجة واوطى النار خالص واسيبه لمدة ساعة مفتحش عليه ...بس من وقت للتانى أميل الحلة وألفها على النار

لما حأكشف على الحلة بعد ساعة حلاقى لسه ظاهر شوية شوربة ...مش معنى كده إنه لسه مستواش...الشوربة دى لما تطفى عليه حيتشربها ويبقى (زبدة )
ملاحظات :
_جربت طريقة تشويح البصل الأول فى الزيت ثم إضافة الطماطم وتسبيكها على النار لقيت نفس النتيجة اللى أنا بأعملها ...فطريقتى أسهل

_متحطيش أبدا الخضرة على النار مع التسبيكة لأن كده إنتى بتضيعى ريحتها لما تيجى تسوى المحشى

_الشكوى الدائمة ...الأرز مش بيستوى كويس ...شوية بيستوى وشوية لأ ؟؟؟؟ علاجها ( متحطيش الأرز يتشوح مع التسبيكة على النار )لأن كده إنتى بتخلى الأرز شوية منه يدخل فى السوى وشوية لأ...فلما تيجى تسوى المحشى مش بيكون كله سوى واحد

ماتعودتش أحط على المحشى لا توم ولا نعناع ولا كسبرة خضراء وكل واحد على ماتعود

الكرنبة الصغيرة بتاخد حوالى (٣)كوبايات أرز ..والكرنبة الكبيرة حوالى (٤)كوبايات ..ده حجم الكرنب الموجود فى القاهرة ...طبعا المحافظات بتبقى الكرنبة ماشاء الله عليها

لو مافيش شوربة ؟؟؟حطى ماية عليها معلقة صلصة ومعلقتين من تسبيكة الطماطم ومعلقة سمنة وظبطى الطعم (ملح وفلفل وكمون )وومكن إضافة مكعب مرق جاهز (وأنا مش بأحب أستخدمه )

لما يفيض خلطة بلاااش تحفظيها فى الفريزر ...مش حتبقى حلوة ...هاتى فلفل رومى واحشيه ويبقى كده عندك صنف محشى كمان

المحشى بالطريقة دى ماشاء الله ريحته مالية الدنيا ..الف هنااا